વડાપ્રધાન નરેન્દ્ર મોદી 8 સપ્ટેમ્બરે એક દિવસીય ગુજરાત પ્રવાસે આવી રહ્યા છે. આ પ્રવાસ દરમિયાન તેઓ વડોદરાના એમ.એસ. યુનિવર્સિટી પેવેલિયન ગ્રાઉન્ડ ખાતેથી સમગ્ર રાજ્ય માટે ₹35,200 કરોડના જંગી વિકાસ કાર્યોનું લોકાર્પણ અને ખાતમુહૂર્ત કરશે. આ મુલાકાતમાં યુવા પેઢી (Gen-Z) સાથેનો આધુનિક કોન્સર્ટ શૈલીનો સંવાદ અને નવસારીમાં આર્ટિફિશિયલ ઇન્ટેલિજન્સ (AI) સુવિધાઓથી સજ્જ જિલ્લા ભાજપ કાર્યાલયનું ઉદ્ઘાટન મુખ્ય કેન્દ્રબિંદુ રહેશે.
વડોદરામાં આયોજિત 'નમો 4 વિકસિત ભારત' કાર્યક્રમ ખાસ કરીને યુવાનો અને પ્રોફેશનલ્સને ધ્યાનમાં રાખીને ડિઝાઇન કરવામાં આવ્યો છે. સભા સ્થળે એક વિશિષ્ટ 'Y' આકારનો રેમ્પ સ્ટેજ તૈયાર કરાયો છે, જેના પર ચાલીને વડાપ્રધાન 6,000 જેટલા ઉપસ્થિત યુવાનો સાથે અનૌપચારિક અને સીધો સંવાદ સાધશે. દેશમાં પ્રથમ વખત કોઈ સરકારી આયોજનમાં એન્ટ્રી માટે 'BookMyShow' પ્લેટફોર્મ મારફતે ઓનલાઇન રજીસ્ટ્રેશન રાખવામાં આવ્યું હતું, જેમાં તમામ 6,000 પાસ ત્વરિત બુક થઈ જતાં આશરે 36,000 લોકો પ્રવેશથી વંચિત રહ્યા હતા. આ સમગ્ર ઇવેન્ટનું લાઇવ કવરેજ અત્યાધુનિક 4K અલ્ટ્રા-એચડી કેમેરા સેટઅપ દ્વારા કરવામાં આવશે.
વડાપ્રધાનના આગમનને પગલે સમગ્ર વડોદરા શહેરને ફતેગંજ, કારેલીબાગ અને VIP રોડ જેવા મુખ્ય માર્ગો પર આકર્ષક રોશનીથી શણગારાયું છે. સુરક્ષા માટે એરપોર્ટથી સભા સ્થળ સુધી ત્રિસ્તરીય અભેદ્ય કવચ ગોઠવી 2,000 થી વધુ પોલીસ જવાનો, 11 DCP અને 17 ACP તૈનાત કરવામાં આવ્યા છે. ડ્રોન સર્વેલન્સની સાથે મંગલ પાંડે બ્રિજ નીચે વિશ્વામિત્રી નદીમાં ફાયર બ્રિગેડે બોટ દ્વારા બોમ્બ સ્ક્વોડ સાથે સર્ચ ઓપરેશન પણ હાથ ધર્યું હતું.
વડોદરાનો કાર્યક્રમ પૂર્ણ કરી પીએમ મોદી દક્ષિણ ગુજરાતના નવસારી પહોંચશે. વડાપ્રધાન બન્યા બાદ નરેન્દ્ર મોદી પ્રથમવાર કોઈ જિલ્લા સ્તરની ભાજપ ઓફિસનું લોકાર્પણ કરવા જઈ રહ્યા છે. કોર્પોરેટ શૈલીમાં અંદાજે ₹10 કરોડના ખર્ચે બનેલું આ ભવન દેશનું પ્રથમ AI-સક્ષમ 'નમો કમલમ' બન્યું છે. નવસારીમાં પીએમના સ્વાગત માટે 1,100 મહિલાઓ દ્વારા કળશ યાત્રા યોજાશે તેમજ 500 ડમરુ વાદકો તેમનું અભિવાદન કરશે. ઉદ્ઘાટન બાદ વડાપ્રધાન 5,000 થી વધુ ડોકટરો, એન્જિનિયરો અને પ્રબુદ્ધ નાગરિકો સાથે વિચાર-વિમર્શ કરશે.
