ગુજરાતના લાખો યુવાનો જેની આતુરતાથી રાહ જોઈ રહ્યા હતા તે બિન હથિયારી પોલીસ સબ ઈન્સ્પેક્ટર (PSI) ભરતીનું અંતિમ પરિણામ જાહેર કરી દેવામાં આવ્યું છે. ગુજરાત પોલીસ ભરતી બોર્ડ દ્વારા લેવાયેલી આ મેરેથોન ભરતી પ્રક્રિયાના અંતે કુલ 472 નસીબદાર ઉમેદવારોની પસંદગી કરવામાં આવી છે. રાજ્ય સરકાર દ્વારા ટૂંક સમયમાં જ આ તમામ નવયુવાન અધિકારીઓને નિમણૂક પત્ર એનાયત કરવામાં આવશે.
મહિલા શક્તિનો દબદબો: 157 મહિલાઓ બની PSI
આ ભરતી પરિણામની સૌથી મોટી વિશેષતા એ છે કે પસંદગી પામેલા 472 ઉમેદવારોમાંથી 157 મહિલા ઉમેદવારો છે. જે દર્શાવે છે કે ગુજરાત પોલીસમાં મહિલાઓનો વ્યાપ અને શક્તિ સતત વધી રહ્યા છે. આ ઉપરાંત, ભરતી બોર્ડ દ્વારા 95 ઉમેદવારોનું વેઇટિંગ લિસ્ટ પણ જાહેર કરવામાં આવ્યું છે, જેથી ભવિષ્યમાં ખાલી પડનારી જગ્યાઓ પર તેઓને તક મળી શકે.
લાખોની સ્પર્ધા અને આકરી કસોટી : આ ભરતી પ્રક્રિયા કોઈ જંગથી ઓછી નહોતી. તેની સફર પર નજર કરીએ તો:
પ્રથમ તબક્કો: અંદાજે 4.60 લાખથી વધુ ઉમેદવારોએ આ ફોર્મ ભર્યા હતા.
શારીરિક કસોટી: જાન્યુઆરી-ફેબ્રુઆરી 2025માં યોજાયેલી ગ્રાઉન્ડ ટેસ્ટ બાદ 1 લાખ ઉમેદવારો લેખિત પરીક્ષા માટે ક્વોલિફાય થયા હતા.
લેખિત પરીક્ષા: 13 એપ્રિલ 2025ના રોજ 300 ગુણની કડક પરીક્ષા લેવામાં આવી હતી, જેમાં 200 ગુણના MCQ અને 100 ગુણના સબજેક્ટિવ પ્રશ્નો પૂછવામાં આવ્યા હતા.
પારદર્શક પ્રક્રિયા અને આગામી કદમ
ભરતી બોર્ડે અત્યંત પારદર્શક રીતે કામગીરી પૂર્ણ કરી છે. ફેબ્રુઆરી 2025માં 1025 ઉમેદવારોના ડોક્યુમેન્ટ વેરિફિકેશન બાદ વાંધા-સૂચનો મંગાવવામાં આવ્યા હતા. તમામ પ્રક્રિયા પૂર્ણ થયા બાદ હવે ફાઈનલ લિસ્ટ બહાર પાડવામાં આવ્યું છે.
હવે પછીની કાર્યવાહી પોલીસ મહાનિર્દેશક અને મુખ્ય પોલીસ અધિકારી (DGP Office), ગાંધીનગર દ્વારા હાથ ધરવામાં આવશે. પસંદગી પામેલા ઉમેદવારોને ટૂંક સમયમાં જ ટ્રેનિંગ માટે મોકલવામાં આવશે અને ત્યારબાદ તેઓ ગુજરાતના વિવિધ પોલીસ સ્ટેશનોમાં પોતાની સેવા આપશે.
